АНУ-ын сагсан бөмбөгийн од Леброн Жэймс Форбес сэтгүүлээс гаргадаг тэрбумтнуудын жагсаалтад багтжээ. Тэрээр NBA-д тоглож байх хугацаандаа тэрбумтан болсон анхны тоглогч болж байна.
Форбес сэтгүүлийн танилцуулснаар Лос Анжелес Лейкэрс багийн од тоглогчийн татвар төлөхөөс өмнөх орлого 1,2 тэрбум ам.долларыг давжээ. Тэр NBA дэх өнгөрсөн 19 жилийн хугацаанд гурван өөр багаас 383 сая ам.долларын цалин авсан ба бусад бизнесийн үйл ажиллагаа, зар сурталчилгааны гэрээ зэргээс 900 сая ам.долларын ашиг орлого цуглуулсан байна.
Леброн Жэймс Nike, AT&T, PepsiCo, Walmart зэрэг үндэстэн дамнасан брэндүүдтэй гэрээ байгуулснаар ашиг орлогоо нэмэгдүүлжээ. NBA-ийн дөрвөн удаагийн аварга Tonal стартап бялдаржуулах төв, Lyft хүргэлтийн платформ, Blaze Pizza зоогийн газруудад хөрөнгө оруулалт хийсэн байна.
эрээр 2014 онд өгсөн ярилцлагадаа тэрбумтны жагсаалтад багтах нь миний хамгийн том зорилго хэмээн ярьж байжээ. Сагсан бөмбөгийн од тамирчдаас Майкл Жордан Форбес сэтгүүлийн тэрбумтны жагсаалтад байдаг ч тэрээр зодог тайлснаасаа хойш 10 гаруй жилийн дараа уг жагсаалтад багтаж байжээ.
Эх сурвалж: CNN
