Эмнести Интернэшнлийн мөрдөн байцаагчид Харьковт Оросын цэргийн гэмт хэргийн нотлох баримт олсон гэж мэдэгджээ.
Хоёр долоо хоногийн турш үргэлжилсэн буудлагын дараа цуглуулсан нотлох баримтаас харахад Оросын цэргүүд 4, 5-р сарын эхээр тус хотод кассет сум болон кластер мина ашигласан байна гэжээ.
Эмнести Интернэшнл тайландаа "Харьковын орон сууцны хорооллыг удаа дараа буудаж байгаа нь сонгомол бус халдлага бөгөөд олон зуун энгийн иргэд амь үрэгдэж, шархадсан" гэж мэдэгджээ.
Украины хоёр дахь том хот болох Харьков 2-р сарын 24-нд Оросууд Украин руу довтолж эхэлснээс хойш тасралтгүй бөмбөгдөлтөд өртөж байсан, 5-р сард Украины цэргүүд оросуудыг хотоос шахан гаргаж чадсан. Тэнд 606 энгийн иргэн амиа алдаж, 600 мянган хүнийг нүүлгэн шилжүүлсэн гэж Украин мэдэгдсэн.
"Эмнести Интернэшнл" байгууллагын судалгааны зөвлөх Жан-Батист Галлопин хэлэхдээ, тоглоомын талбай руу кассет сумаар халдлага үйлдэж, есөн хүний амь үрэгдэж, 35 хүн шархадсан тухай нотлох баримт олдсон гэж мэдэгдсэн.
Харьковын 40 настай оршин суугч Иван Литвиненко дөрөвдүгээр сарын 15-нд Индустриальный дүүрэгт болсон ийм халдлагын талаар Эмнести Интернэшнл агентлагт ярьжээ.
Түүний эхнэр Оксана болон дөрвөн настай охины хамт явж байсан тоглоомын талбайд хэд хэдэн кассет зэвсэг дэлбэрч, эхнэр нь үхлийн шарх авчээ.
Түүнийг Эмнести Интернэшнлтэй ярилцах үед эхнэрийнх нь биеийн байдал хүндхэн эмнэлэгт байсан. Тэрээр дараа нь нас барсан ажээ.
Оросууд одоог хүртэл энгийн иргэдийг буудсан гэдгээ няцаасаар байгаа бөгөөд Орос, Украин хоёр аль аль нь кассет сум ашиглахыг хориглосон олон улсын гэрээнд гарын үсэг зураагүй байна.
Ийм зэвсгийг сонгомол бусаар буюу энгийн иргэдийг хөнөөж, хохироохоор хэрэглэсэн байвал дайны гэмт хэрэг болно гэж Эмнести Интернэшнл мэдэгджээ.
Мөн тус байгууллага Украины арми орон сууцны барилгуудын ойролцоо их буугаа байрлуулсан нь Оросын галд өртөх боломжийг ойртуулсанаараа олон улсын хүмүүнлэгийн хуулийг зөрчсөн, гэвч энэ нь Оросын цэргүүдийн хотыг тасралтгүй буудсан хэрцгий үйлдлүүдийг зөвтгөх үндэслэл биш юм" гэж үзжээ.
Эх сурвалж: BBC Русская служба
