ОХУ-ын Ерөнхийлөгч В.Путин Санкт-Петербургт болсон Олон улсын эдийн засгийн форумд оролцож үг хэллээ. Барууны орнууд олон улсын хамтын ажиллагаа үндсэн ойлголтуудыг зориудаар үгүй хийж, дэлхийн мөнгөн тэмдэгтэд итгэх итгэлийг алдагдуулж байна гэж тэрээр мэдэгджээ. Ерөнхийлөгч Оросын эсрэг хориг арга хэмжээг "галзуу, бодлогогүй" гэж нэрлээд Орос улс эдийн засгийн байдлаа аажмаар хэвийн болгож, харин АНУ болон Европ эсрэгээрээ хориг арга хэмжээний улмаас их хэмжээний хохирол амсаж байгаа хэмээн хэлжээ. Тэр хохирлыг ойролцоогоор 400 тэрбум доллароор үнэлжээ.
Путиний хэлснээр, АНУ болон Европын эдийн засгийн уналт нь Украины дайнтай холбоогүй бөгөөд энэ нь "Их 7-гийн орнуудын урт хугацааны хариуцлагагүй макро эдийн засгийн бодлого, тэр дундаа мөнгийг хяналтгүйгээр эргэлтэд оруулах, баталгаагүй өрийн хуримтлал зэрэг"-ийн улмаас нэлээд эрт эхэлсэн зүйл гэжээ. Тэрбээр Украинд болж буй тусгай ажиллагаа бол барууныхны хувьд бүх асуудалд Оросыг буруутгах боломж олгосон авралын тойрог гэж нэрлэсэн байна. Путин "тусгай ажиллагаа" үргэлжилж, бүх зорилгодоо хүрнэ гэж дахин мэдэгдэв. Тэрээр "Дэлхийн нэг туйлт дэг журмын эрин үе дууслаа" гэж хэлээд Европын холбоог түүний бодлоор "улс төрийн бүрэн эрхт байдлаа бүрмөсөн алдсан", "өөр хэн нэгний аяыг даган бүжиж байна" хэмээн шүүмжиллээ.
Ерөнхийлөгчийн хэлснээр, Орос улс хүнс, бордооны экспортоо мэдэгдэхүйц нэмэгдүүлэх боломжтой, үр тарианы нийлүүлэлтийн хэмжээ ирэх улиралд 50 сая тонн хүртэл нэмэгдэж магадгүй юм. Украины үр тарианы экспортын тухайд Путин хэлэхдээ, Орос үүнд саад болохгүй: түүний бодлоор Украинчууд өөрсдөө Хар тэнгисийн боомтуудын замыг хаасан бөгөөд энэ асуудлыг өөрсдөө шийдэх ёстой. Мөн Украин өөрийн боомтуудаас экспортолсон үр тарианы борлуулалтаас олсон орлогыг барууны орнуудаас зэвсгийн шинэ багц худалдан авахад зарцуулж магадгүй гэж тэрээр санаа зовж буйгаа илэрхийлжээ. Путин Украины засгийн газрын ийм санаа зорилгын талаар ямар ч баталгааг гаргаж ирээгүй ч "Киевийн эрх мэдэл бүхий хүмүүсийн эрүүл ухаантай байгаа" гэдэгт дахин эргэлзсэн юм.
Путин бүрэн эрхт байдлын үзэл баримтлалд онцгой анхаарал хандуулж, жинхэнэ тусгаар тогтносон улсууд л амжилтад хүрдэг гэж хэлэв. Оросын эдийн засгийг дэмжихийн тулд Путин багц арга хэмжээг санал болгожээ. Орон сууцны хөнгөлөлттэй зээлийн хүүг одоогийн 9 хувиас 7 хувь болгон бууруулна; Аж үйлдвэрийн ипотекийн зээлийн хүү нь жилийн 5% байх болно. Мөн аж ахуйн нэгжүүдэд хийх шалгалтуудаас татгалзаж, эдийн засгийн хэд хэдэн гэмт хэргүүдийг гэмт хэрэгт тооцохгүй байхыг уриалжээ. Ялангуяа гадаадын түншүүд нь тусгай зөвшөөрлийг нь цуцалсан аж ахуйн нэгжүүд үйл ажиллагаагаа үргэлжлүүлэх ёстойг Путин тэмдэглэжээ. Тэрээр бизнес эрхлэгчдийг Орост хөрөнгө оруулалт хийхийг, гэр бүлүүдийг олон хүүхэдтэй болохыг уриалжээ.
Эх сурвалж: Радио Свобода
