7-р сарын 14-ний үдээс хойш Винница хотын төв пуужингийн цохилтод өртжээ. Владимир Зеленскийн ажлын албаныхан цохилтыг Хар тэнгис дэх Оросын шумбагч онгоцноос Калибр далавчит пуужингаар хийсэн гэж мэдэгдэв. Винница мужийн тэргүүн Сергей Борзовын хэлснээр, агаарын довтолгооны хамгаалалт дөрвөн пуужинг онож унагаасан байна. Хотод хэд хэдэн дэлбэрэлт сонсогдож, гал гарч эхэлсэн. Үүнээс гадна оффисын барилга, Офицеруудын ордон, орон сууцны барилгууд эвдэрсэн байна.
Винница руу пуужин харвасны улмаас хамгийн сүүлийн мэдээллээр 23 хүн амь үрэгдсэний гурав нь хүүхэд байжээ. Орон нутгийн 117 иргэн эмнэлгийн тусламж хүссэн байна. 71 хүн эмнэлэгт хэвтэн эмчлүүлж байна. Өөр 18 хүн сураггүй алга болсонд тооцогдож байна.
Украины Ерөнхийлөгч Владимир Зеленский фронтын шугамаас хэдэн зуун километрийн зайд орших Винница хотыг буудсаныг энгийн иргэдийн эсрэг хийсэн террорист халдлага гэж нэрлэжээ. Барууны орнуудад хандсан уриалгадаа тэрээр Оросыг "террорист улс" гэж хүлээн зөвшөөрөхийг шаардсан байна.
ОХУ-ын Батлан хамгаалах яам Винница руу пуужингаар дайрсан тухай тайлбар хийхдээ гадаадын зэвсэг нийлүүлэгчидтэй уулзалт хийсэн гэх Офицеруудын ордон руу онилсон гэж мэдэгджээ. Харин Киев мэдэгдэлдээ энэ бол бүс нутгийн хамгийн том концертын танхим, цэргийн зориулалтаар ашиглаагүй гэж нотлон хэлж байна.
Эх сурвалж: Euronews, Медуза
