ОХУ-ын төрийн нэрт зүтгэлтэн, ЗХУ-ын сүүлчийн удирдагч Михаил Горбачев мягмар гарагт таалал төгссөн билээ. Москвагийн клиникийн төв эмнэлэгт хэвтэн эмчлүүлж байгаад таалал төгссөн Горбачевд хүндэтгэл үзүүлж Ерөнхийлөгч Владимир Путин пүрэв гарагт эмнэлгийн гадаа очиж цэцэг өргөсөн байна.
Төрийн зүтгэлтнийг оршуулах арга хэмжээг маргааш бямба гарагт зохион байгуулахаар төлөвлөсөн ч Ерөнхийлөгч Путины ажлын төлөвлөгөөнд оршуулгад оролцох хөтөлбөр багтаагүй гэж Кремлийн хэвлэлийн төлөөлөгч Дмитрий Песков мэдэгджээ.
Хүйтэн дайныг төгсгөл болгоход Михаил Горбачевын хувь нэмэр их ч ЗХУ-ын бүрэлдэхүүнийг тараан бутаргасан нь 20 дугаар зууны дэлхийн геополитикийн асар том сүйрэл болсон гэж Путин 2005 онд хэлж байжээ.
Горбачевын оршуулгыг олон нийтэд нээлттэй явуулсны дараа Новодевичийн оршуулгын газарт 1999 онд таалал төгссөн эхнэр Райсагийнх нь дэргэд үүрд нойрсуулах ажээ.
Эх сурвалж: ВВС
