“Короновируст халдвар (Ковид-19)-ын эсрэг вакцин нэвтрүүлсний дараах үнэлгээ” танилцуулах уулзалт өнөөдөр /2022.09.07/ Эрүүл мэндийн яаманд зохион байгуулагдлаа.
Тус уулзалтад ЭМЯ-ны Нийтийн эрүүл мэндийн газрын дарга Д.Баярболд, ДЭМБ-ын суурин төлөөлөгчийн үүрэг гүйцэтгэгч Моника Фонг, ДЭМБ-ын НДББ-ийн зөвлөх Гленда Гонзалес, ЭМЯ-ны Халдварт өвчний хэлтсийн дарга Л.Энхсайхан, ХӨСҮТ-ийн Ерөнхий захирал Ц.Билэгтсайхан, ХӨСҮТ-ийн дэд захирал Ж.Байгалмаа болон бусад албаны хүмүүс оролцлоо.
Энэхүү үнэлгээний багийн үндсэн зохион байгуулагчаар ЭМЯ, ХӨСҮТ ажиллаж байгаа бөгөөд ДЭМБ-ын мэргэжилтнүүд болон АНУ-ын Өвчний хяналт урьдчилан сэргийлэх төвийн хоёр мэргэжилтэн хамтран ажиллахаар ирсэн байна. Мөн НҮБ-ын хүүхдийн сан, ДЭМБ-ын Ази номхон далайн бүс, ДЭМБ-ын монгол дахь суурин төлөөлөгчийн газруудыг хамарсан өргөн бүрэлдэхүүнтэй баг оролцож үнэлгээг хийнэ.
Короновируст халдварын эсрэг вакцин нэвтрүүлсний дараах үнэлгээг 2022 оны 9 сарын 18-30-ны өдрүүдэд хийгдэх бөгөөд үндэсний хэмжээнд, дүүрэг аймгийн түвшинд болон сумын түвшинд нь бодлогын баримт бичиг, бэлэн байдал, татан авалтууд, вакцины хүйтэн хэлхээний нөхцөл байдал, хүний нөөц, вакцин түгээлт, агуулах зэрэг чиглэлд үнэлгээ хийж ажиллах юм.
