Умард Солонгос улс өнөөдөр өглөө Солонгосын хойгийн зүүн эргийн далайд ойрын зайн тусгалтай хоёр баллистик пуужин харвасан тухай Өмнөд Солонгосын талаас мэдэгдлээ.
Энэ долоо хоногийн эхэнд Пхеньян дундын зайн тусгалтай пуужинг Японы нутаг дээгүүр хөөргөснөөс хойш Америк, Өмнөд Солонгос хамтран өдөөн хатгалгад хариу барьж цэргийн хүчин чадлаа харуулахаар агаарын хүчний сургуулилалт хийж, пуужин хөөргөсөн.
Умард Солонгосын өнөөдөр хөөргөсөн ойрын тусгалт баллистик пуужинг Пхеньяны ойролцоох Самсокын нутаг дэвсгэрээс харвасан гэж мэдээлж байна. Энэ нь өнгөрсөн хоёр долоо хоногт Умардын харвасан зургаа дахь баллистик пуужин болж байгаа юм.
Мягмар гарагт Пхеньян Японы нутаг дээгүүр пуужин харваснаас ард иргэдийг түр хоргодох байранд нуугдах сэрэмжлүүлэг дохио дуугарсан. Үүнээс үүдэлтэйгээр Солонгосын хойгт тогтворгүй байдал үүсэж, хоёр Солонгос, Америк цэргийн хүчин чадлаараа өрсөлдөх өнгө аяс ажиглагдаж байна.
Эх сурвалж: CNN
