Америкийн TMZ сайт 34 настай реппер, жүжигчин Аарон Картерыг нас барсныг зарлажээ. Мэдээллийн дагуу Картерын цогцсыг Калифорни мужийн Ланкастер дахь гэрийнх нь угаалгын өрөөнөөс ваннд живсэн байхыг олжээ. Картер дөрвөн студийн цомог гаргасан бөгөөд анхных нь дөнгөж 9 настай байхдаа хэвлэгдэж байжээ. Crush On You зэрэг хит дуунууд нь түүнийг дэлхийд алдартай болгосон. Түүнийг Backstreet Boys хамтлагийн гишүүн Ник Картерын дүү гэдгээр нь мэддэг ба үргэлж алдарт ах Никийнхээ сүүдэрт үлдсэн гэж Ройтерс агентлагт мэдээлжээ.
Картерын байшингаас талийгаачийг олсон гэдгээ цагдаагийнхан баталж, мөрдөн байцаалтын ажиллагаа эхлүүлээд байна.
Анх Аарон Картер Nickelodeon-р байнга гардаг од хүүхэд байсан. Дараа нь тэрээр реп сонирхох болсон бөгөөд мөн Broadway үзвэрүүдэд оролцдог байжээ.
Тэрээр олон жилийн турш хар тамхины донтолтын асуудалтай тулгарсан.
Телевизийн шоунуудын нэгэнд тэрээр өөрийгөө сэтгэцийн эмгэг, шизофрени, сэтгэлийн гутралтай гэж оношлогдсон гэдгээ хүлээн зөвшөөрсөн байна.
The Hollywood Reporter сонинд мэдээлснээр Картер өөрийн хүү Принсийнхээ асран хамгаалах эрхийг эргүүлэн авахын тулд энэ оны эхээр хар тамхины эмчилгээний төвүүдэд удаа дараа хандсан байна.
Олон хүн Картерын зовлон бэрхшээлийг түүний эрт үеийн алдар нэрд гарсны үр дүн гэж үздэг байна.
Эх сурвалж: ЭкспрессК
