Замбийн Гадаад хэргийн яамнаас өмнө нь ОХУ-д суралцаж байсан тус улсын иргэн Украины дайнд амиа алдсан гэж мэдэгджээ. Энэ бол Украин дахь байлдааны ажиллагаанд оролцохоор Орос улсын талд оролцсон гадаадын иргэн амиа алдсан анхны тохиолдол юм.
Замбийн Гадаад хэргийн сайдын мэдээлснээр, 23 настай оюутан Лемехани Натан Ниренда есдүгээр сарын 22-нд Украинд "дайны талбарт" нас баржээ. Түүний цогцос одоогоор Ростов-на-Дону хотод байгаа бөгөөд удахгүй Замби руу илгээх болно гэж тус яамны мэдэгдэлд дурдсан байна. Замбийн Гадаад хэргийн яам түүнийг ямар гэмт хэрэгт буруутгагдан хоригдож байсан талаар тодорхой мэдээлээгүй ч 2020 оны дөрөвдүгээр сард түүнийг есөн жил хагасын хорих ял авсан гэж мэдээлсэн байна.
Хоригдохоосоо өмнө Ниренда Москвагийн Инженерийн Физикийн Их Сургуульд (МИФИ) цөмийн байгууламжийн дизайнаар суралцаж байжээ.
"Үйл явдлын энэхүү туйлын харамсалтай өрнөлтэй холбогдуулан Замбийн засгийн газар Москвад хорих ял эдэлж байсан Замбийн иргэнийг Украины дайнд татан оролцуулж, улмаар нас барсан нөхцөл байдлын талаар яаралтай мэдээлэл өгөхийг Оросын эрх баригчдаас шаардаж байна" гэж Замбийн гадаад хэргийн сайд Какубо мэдэгдэлдээ дурджээ.
Өмнө нь олон хэвлэл мэдээллийн хэрэгсэл, тэр дундаа ВВС-ийн Оросын албаны сурвалжлагчид Вагнер ЧВК-г үүсгэн байгуулагч Евгений Пригожин Оросын хоригдлуудыг Украинд байлдахаар явахыг биечлэн ухуулж байсан гэж мэдээлж байсан.
“Осторожно, новости” телеграм сувгийн мэдээлснээр, Ниренда МИФИ-д цөмийн физикийн чиглэлээр суралцаж байсан бөгөөд 2020 оны 8-р сард мефедрон буюу сэтгэцэд нөлөөлөх бодис авч явсан хэргээр Москвагийн Кусково цэцэрлэгт хүрээлэнгээс баригджээ. Мөрдөн байцаалтын явцад оюутан гурван "боодол" зарж амжсаныг тогтоосон гэж тус суваг мэдээлжээ. Түүнийг Тверь муж дахь колони руу явуулж, тэндээсээ Украинд дайнд явсан байна.
Эх сурвалж: BBC
