АНУ болон түүний НАТО-гийн холбоотнууд Польшид хоёр хүний аминд хүрсэн дэлбэрэлтийг мөрдөн шалгахад тусална гэж АНУ-ын Ерөнхийлөгч Жо Байден мэдэгджээ. Урьдчилсан мэдээллээр пуужин ОХУ-ын нутгаас харваагүй байх магадлалтай гэж үзэж байна. Тэрээр арваннэгдүгээр сарын 16-ны лхагва гарагт Индонезийн Бали аралд жил бүр болдог “Их 20”-ийн дээд хэмжээний уулзалтад цугларсан дэлхийн удирдагчидтай яаралтай уулзалт хийсний дараа сэтгүүлчдэд ярилцлага өгчээ.
Пуужинг Оросын нутаг дэвсгэрээс харвасан гэж хэлэхэд эрт биш үү гэх асуултад Байден "Үүнийг үгүйсгэх урьдчилсан мэдээлэл бий. Бид үүнийг бүрэн шалгаж дуустал энэ талаар яримааргүй байна, гэхдээ замналын хувьд бол Оросоос гаргасан байх магадлал багатай байна" гэжээ. АНУ болон НАТО-гийн орнууд арга хэмжээ авахаасаа өмнө бүрэн мөрдөн байцаалт явуулна гэж тэр нэмж хэлжээ.
Байден "Их 7"-ын орнууд болон НАТО-гийн удирдагчидтай яаралтай хуралдаж Украинтай хил залгаа Польшийн Пшеводув тосгонд болсон үйл явдлын талаар ярилцаж, Польшийн Гадаад хэргийн яам болон Украины эрх баригчдын мэдээлснээр Орост үйлдвэрлэсэн пуужин газардсан гэж мэдээлж байна.
"Бид Польшийн зүүн хэсэгт Украины хилийн ойролцоо гарсан дэлбэрэлтийн талаар ярилцлаа. Польшийн зүгээс мөрдөн байцаалтын ажиллагаа явуулж байгаа үйл ажиллагаанд бид бүх талын дэмжлэг, туслалцаа үзүүлэхээ санал болгож байна. Мөрдөн байцаалтын явцад дараагийн зохих алхмуудыг тодорхойлохын тулд нягт харилцаатай байхаар тохиролцлоо" хэмээн АНУ, Канад, Франц, Герман, Итали, Япон, Нидерланд, Испани, Их Британи, түүнчлэн ЕХ-ны төлөөлөгчид уулзалтын дараа нийтэлсэн хамтарсан мэдэгдэлд дурдсан байна.
Уулзалтад оролцогчид мөн 11-р сарын 15-нд ОХУ-аас Украины хотууд болон иргэний дэд бүтцэд хийсэн пуужингийн дайралтыг буруушааж байна. Тэд ОХУ-ын түрэмгийллийн эсрэг Украин болон Украины ард түмнийг үргэлжлүүлэн дэмжиж, мөн Орост хариуцлага тооцоход бэлэн байгаагаа дахин ярьжээ.
Польшид болсон дэлбэрэлттэй холбогдуулан НҮБ-ын Ерөнхий нарийн бичгийн дарга Антонио Гутерриш Украин дахь дайныг даамжруулахаас сэргийлэхийг уриалав. "Антонио Гутерриш Польшид пуужингийн дэлбэрэлт болсон тухай мэдээлэлд маш их санаа зовж байна. Украин дахь дайныг даамжруулахаас зайлсхийх нь туйлын чухал" гэж түүний хэвлэлийн төлөөлөгч твиттер хуудсандаа бичээд НҮБ-ын Ерөнхий нарийн бичгийн дарга амиа алдагсдын ар гэрийнхэнд эмгэнэл илэрхийлжээ.
Эх сурвалж: DW
