Япон улс ирэх 5 жилд батлан хамгаалах чадавхаа бэхжүүлэхэд 320 тэрбум доллар хуваарилж, цэргийн төсвөөр дэлхийд гуравт орохоор болж байна.
Ингэснээр Япон улс цэргийн зардалдаа АНУ, БНХАУ-ын дараа орох гурав дахь орон болно. Энэхүү стратеги нь 2027 оны санхүүгийн жилд цэргийн жилийн зардлыг ДНБ-ий 1-ээс 2 хувь хүртэл нэмэгдүүлэхээр тусгасан. Bloomberg-ийн мэдээлснээр, ирэх онд Японы батлан хамгаалахын зардал одоогийн төсөвтэй харьцуулахад 57 хувиар өсөх юм байна.
Ерөнхий сайд Фумио Кишида шинэ төлөвлөгөөний талаар тайлбар хийхдээ энэ алхмыг тус улсын "түүхэн дэх эргэлтийн цэг" гэж нэрлэжээ. Түүний хэлснээр, хүчин чадлыг нэмэгдүүлсэн нь Японд тулгарч буй "аюулгүй байдлын сорилтуудад хариу үйлдэл үзүүлэх" юм.
Цэргийн зардал нэмэгдсэн нь Орос Украинд түрэмгийлсэнтэй холбоотой.
Японы засгийн газрын төлөвлөгөөнд Хятад улс Тайваньд довтлоход ашиглаж болзошгүй Орос улсын Украин руу довтлох жишиг нөлөөлсөн гэж Ройтерс тэмдэглэжээ. Аюулгүй байдлын шинэчилсэн стратегид тус улс Хятадыг "хамгийн том стратегийн сорилт", Оросыг "аюулгүй байдлын асуудал" гэж үзэж байна.
Хятадын Тайваньд хийж болзошгүй түрэмгийлэл нь ойролцоох Японы арлуудад заналхийлж, хагас дамжуулагчийн нийлүүлэлтийг тасалдуулж, нефть тээвэрлэх замыг хааж болзошгүй гэж тус агентлаг мэдэгджээ. Японы флотын командлагч асан Йожи Кодагийн хэлснээр "Энэ нь Японд шинэ чиг хандлагыг бий болгож байна. Зөв хэрэгжүүлбэл өөрийгөө хамгаалах хүчин үнэхээр үр дүнтэй дэлхийн хэмжээний хүчин болно" гэж Ройтерс агентлаг иш татжээ.
Тус стратегид хэлсэнчлэн Токио Дэлхийн 2-р дайнаас хойших "хамгийн аймшигт, хамгийн хэцүү аюулгүй байдлын нөхцөл байдалтай" нүүр тулж байна гэжээ. Үүний зэрэгцээ тус улс "зөвхөн өөрийгөө хамгаалахад чиглэсэн бодлого" баримталж, "цэргийн гүрэн болохгүй" гэж амлаж байна. Япон улс дайн хийх эрхээсээ татгалзаж байгаа нь дэлхийн хоёрдугаар дайны дараа бичигдсэн тус улсын үндсэн хуулийн есдүгээр зүйлд тусгагдсан байдаг байна.
Эх сурвалж: DW
