Япон улс Альцгеймерийн өвчнийг оношлох цусны шинжилгээний иж бүрдлийг баталлаа. Энэ нь дэлхий даяар хэдэн арван сая хүнд нөлөөлж буй өвчнийг даван туулахад ховорхон ахиц дэвшил юм.
Sysmex корпорац өвчний шинж тэмдэг болох уургийн хуримтлалыг хэмждэг иж бүрдлийг "аль болох хурдан" зах зээлд гаргахаар ажиллаж байна гэж мэдэгдлээ. Альцгеймерийг оношлох өнөөгийн байгаа аргууд нь өндөр өртөгтэй, анагаах ухааны хувьд төвөгтэй бөгөөд ихэвчлэн тархины сканер эсвэл тархи нугасны шингэнийг хатгалтаар авч шинжилдэг байна.
"Sysmex нь Альцгеймерийн өвчнийг оношлох асуудлыг шийдвэрлэхийн тулд тархинд хуримтлагдсан бодисыг (бета-амилоид) илүү хурдан бөгөөд хялбар тодорхойлох технологийг хөгжүүлж байна" гэж компани мэдэгджээ.
"Ердийн шинжилгээний аргуудаас ялгаатай нь тус иж бүрдэл нь цусаар шинжилгээ хийх боломжийг олгодог бөгөөд ингэснээр өвчтөнд үзүүлэх бие махбод, сэтгэл санаа, санхүүгийн ачааллыг бууруулдаг" гэж нэмж хэлсэн байна. АНУ-д төвтэй Альцгеймерийн нийгэмлэг "өвчнийг оношлох цусны шинжилгээ гэх мэт энгийн, хямд, инвазив бус, хялбар олдоцтой оношилгооны багаж хэрэгсэл яаралтай хэрэгтэй байна" гэж мэдэгдсэн. "Ирээдүйд тэд Альцгеймер болон бусад бүх оюун ухааны хомсдолын оношилгооны үйл явцад хувьсгал хийх магадлал өндөр байна" гэж тус нийгэмлэг өөрийн вэбсайтдаа бичжээ.
Өнгөрсөн сард мэдээлснээр леканемаб хэмээх шинэ эм нь Альцгеймерийн өвчтэй хүмүүсийн танин мэдэхүйн бууралтыг 18 сарын хугацаанд 27 хувиар удаашруулсан байна. Үр дүн нь мөн тархины цус алдалт, хаван зэрэг гаж нөлөө байгааг илрүүлсэн ч танин мэдэхүйн доройтлын өвчтэй хүмүүст "бодит эмчилгээний сонголт" болох эм мөн хэмээн санал болгож байна.
Альцгеймерийн өвчний үед хоёр гол уураг болох тау-уураг болон бета-амилоид нь бөөгнөрөл, товруу болж хуримтлагддаг бөгөөд энэ нь тархины эсийг үхүүлж, тархины агшилтад хүргэдэг байна.
Эх сурвалж: CNA
