АНУ-ын Калифорни мужийн Номхон далайн эргийн төв зам дагуу Tesla-ын машин 30 метр өндөр хадан цохио руу унаж осолджээ. Ослын үеэр машин дотор байсан насанд хүрсэн хоёр иргэн, хоёр хүүхэд эсэн мэнд үлдсэн байна.
Осол даваа гарагийн өглөө Сан Францискогоос урагш 32 км-т болжээ. Ослын газарт холбогдох албаны хүмүүсийг очиход машин дотор байсан бүх зорчигч гарч чадалгүй гацсан ч эсэн мэнд байсанд маш их гайхсан тухайгаа ярьсан байна. Уг хадан цохионоос машин унаж осолдох нь ховор биш боловч ийм хүнд ослоос хүн амьд гарах нь тун цөөхөн тохиолддог ажээ.
Tesla машинд байсан эрэгтэй эмэгтэй зорчигч болон есөн настай хүү, дөрвөн настай охин суудлын бүсээ бүсэлсэн байжээ. Мөн хүүхдүүд зориулалтын суудалд суусан байсан нь тэднийг амьд үлдээсэн гэж мэдэгдэж байна.
Одоогоор ослын шалтгаан бүрэн тогтоогдоогүй байгаа юм. Мөн машинд байсан зорчигчид нэг гэр бүл эсэх нь тодорхойгүй байгаа аж. Ослыг мөрдөн шалгаж байгаа тул удахгүй эдгээр болон бусад мэдээлэл тодорхой болох юм байна.
Эх сурвалж: CNN
