80 дахь удаагийн "Алтан бөмбөрцөг" шагнал гардуулах ёслол Лос Анжелес хотноо боллоо. Наадмын гол шагналтнууд нь найруулагч Стивен Спилберг, жүжигчин Кейт Бланшетт, жүжигчин Остин Батлер нар байлаа.
Холливудын нэрт найруулагч Спилберг шилдэг найруулагчийн шагналыг өөрийн залуу насаа хэсэгчлэн дүрсэлсэн "Фабелманс" хэмээх киногоороо хүртлээ. Мөн тус кино шилдэг кино номинацид шалгарсан байна.
Кейт Бланшетт Берлиний Филармонийн найрал хөгжмийн удирдаачийн дүрд тоглосон "Тар" киноны шилдэг эмэгтэй жүжигчний төрөлд "Алтан бөмбөрцөг" хүртжээ. Жүжигчин бүсгүй яг одоо Их Британид зураг авалтаа хийж байгаа тул ёслолд оролцоогүй байна.
Жүжигчин Остин Батлер алдарт дуучин Баз Лурманы найруулсан Элвис Преслигийн тухай Элвис киногоороо шилдэг эрэгтэй гол дүрийн шагнал хүртлээ.
Ирландын жүжигчин Колин Фаррелл Ирландын алслагдсан арал дээр өрнөж буй “The Banshees of Inisherin” эмгэнэлт инээдмийн киногоороо инээдмийн /мюзиклийн төрөлд шилдэг эрэгтэй гол дүрийн шагналыг хүртлээ. Энэхүү кино нь "инээдмийн/мюзикл" төрөлд шилдгээр шалгарч, мөн киноны зохиолч Мартин МакДон "Алтан бөмбөрцөг" шагнал авсан байна.
Мишель Йео "Everything Everywhere All At Once" хэмээх параллель ертөнц дэх амьдралын тухай шинжлэх ухааны уран зөгнөлт инээдмийн киногоор инээдмийн/мюзикл төрөлд шилдэг эмэгтэй дүрийн шагналыг хүртсэн байна.
Инээдмийн жүжигчин Эдди Мерфи энэ жил кино урлагийн шилдэгийн төлөөх нэр хүндтэй Сесил Б.ДеМиллийн шагналыг хүртжээ.
Шилдэг олон ангит киногоор "Game Of Thrones"-ын өмнөх үйл явдлын тухай болох "House of Dragon" кино шалгарлаа. Ёслолын үеэр Украины Ерөнхийлөгч Володимир Зеленскийн видео мэдэгдлийг мөн үзүүлсэн байна. Америкийн The Hill сонинд бичсэнээр, Зеленский Алтан бөмбөрцөг шагналыг Дэлхийн хоёрдугаар дайны үеэр буюу 1943 оноос олгож эхэлсэн тухай дурссан байна. Тэрээр хэлэхдээ, Украин Оросын түрэмгийллийн эсрэг тулалдаж байгаа нь "дайны тухай зөвхөн киноноос харж байсан шинэ үеийнхний эрхийн төлөөх тэмцлийг" бэлэгдэж байна. Зеленский "Дэлхийн нэгдүгээр дайнд олон сая хүн амиа алдсан. Дэлхийн хоёрдугаар дайн хэдэн арван сая хүний аминд хүрсэн. Дэлхийн гуравдугаар дайн гэж байхгүй. Энэ бол гурвалсан зохиол биш" хэмээн хэлжээ.
Энэ жилийн уг ёслол нь ковид цар тахлын улмаас тогтоосон хорио цээрийн арга хэмжээг цуцалснаас хойшхи анхны удаагийнх юм. Уг ёслолд дуучин Рианна, Брэд Питт, Маргот Робби зэрэг олон одод хүрэлцэн иржээ.
Дуулианы дараа
Алтан бөмбөрцөг наадмыг зохион байгуулагчид 2021 онд дэгдсэн дуулианы дараа уг шагналын нэр хүндийг сэргээх гэж найдаж байна. Дараа нь Лос Анжелес Таймс сонинд Холливудын Гадаад Хэвлэлийн Холбооны (HFPA) гишүүд үндэслэлгүй их хэмжээний төлбөр авдаг бөгөөд шагналын шүүгчдийн шийдвэр нь зарим тохиолдолд кино үйлдэрлэгчдийн төлөөлөгчид болон холбооны гишүүдийн харилцаанаас хамаардаг гэсэн судалгааг нийтэлжээ.
Хэдэн арван жилийн турш тус холбооны гишүүдийн дунд нэг ч хар арьст сэтгүүлч байгаагүй гэж тус сонин онцолжээ.
Мөрдөн байцаалтын ажиллагаа нийтлэгдсэний дараа 1964 оноос хойш шагнал гардуулах ёслолыг дамжуулж байсан NBC телевиз 2022 онд нэвтрүүлгээ зогсооно гэж мэдэгджээ. Энэ жил тэд "Алтан бөмбөрцөг"-ийн шагнал гардуулах ёслолыг дахин үзүүлж, үүнийгээ онцгой тохиолдол болгон хийсэн гэж мэдэгджээ.
HFPA нь шүүгчдийн бүрэлдэхүүнийг өргөжүүлэх, илүү нээлттэй болгох зэрэг ажлын зарим зарчмуудаа өөрчилсөн. Мөн шүүгчдийг кино студи, телевизийн компаниудаас бэлэг авахыг хориглосон байна.
Гэсэн хэдий ч Холливудын зарим одод энэ жилийн "Алтан бөмбөрцөг"-ийг үл тоомсорлосон хэвээр байна.
Шилдэг эрэгтэй гол дүрийн номинацид "The Whale" киногоороо нэр дэвшсэн жүжигчин Брендан Фрейзер ёслолд оролцохгүй гэж мэдэгджээ. Үүнээс өмнө тэрээр HFPA-ийн дарга асан Филип Беркийг 2003 онд өөрт нь бэлгийн дарамт учруулсан гэж буруутгаж байсан. Ийм үйлдэл үнэхээр гарсан гэдгийг тус холбоо тогтоосон ч “Энэ бол бэлгийн дарамт биш, хошигнол байсан” гэж үзжээ.
Тэмцээнийг тойрсон маргааны дунд 2021 онд гурван "Алтан бөмбөрцөг"-өө эргүүлэн өгсөн Том Круз мөн ёслолын ажиллагаанд оролцоогүй.
Скарлетт Йоханссон өмнө нь "Алтан бөмбөрцөг"-ийг бойкотлохыг уриалж байсан бөгөөд түүний "Өшөө авагч" кинонд хамтран тоглогч Марк Руффало HFPA-д хийсэн шинэчлэлийг "найдваргүй арга" гэж нэрлэжээ.
Эх сурвалж: BBC
