Лондон хотын Юстоны өртөөний ойролцоох Гэгээн Алойсиус сүмийн гадаа нас барагсдын дурсгалыг хүндэтгэх ёслол болж байсан ба гашуудагчид руу зэвсэгт этгээд гал нээсний улмаас таван хүн шархадсан байна. Лондон хотын хамгийн хөл хөдөлгөөн ихтэй галт тэрэгний буудлаас 300 метрийн зайд байрлах газар Бямба гарагийн 13:30 цагийн орчимд үйл явдал болжээ.
Нийслэлийн цагдаагийн газраас мэдээлснээр долоон настай охины биеийн байдал "амь насанд аюултай", 48 настай эмэгтэй хүнд гэмтэл авсан гэжээ.
Харин 54, 41 настай өөр хоёр эмэгтэй амь насанд нь аюулгүй гэмтэл авч эмчлүүлж байгаа бол 12 настай охин хөлдөө "хөнгөн гэмтэл" авсан байна. Мөн халдлагын дараа 21 настай эмэгтэй Лондон хотын төв эмнэлэгт хүргэгджээ.
Одоогоор баривчилгаа хийгээгүй байна гэж цагдаагийн газраас мэдээллээ.
Өнгөрөгч арваннэгдүгээр сард нас барсан 50 настай Фресиа Калдерон болон түүний охин 20 настай Сара Санчес нарт хүндэтгэл үзүүлж байх үед зэвсэгт этгээд "хар машин"-аас гал нээснийг нүдээр харсан гэрчүүд мэдэгджээ.
Гэгээн Алойсиус сүмийн эцэг Жереми Троод The Telegraph-т хэлэхдээ: "Би буун дуу эсвэл тэсрэх чимээг сонссон. Энэ нь ганц, чанга дуу чимээ байсан бөгөөд энэ нь ердийн чимээ биш, гудамжны энгийн чимээ биш юм. Тэгээд дараа нь хашхирах чимээ гарч хүмүүс сүм рүү гүйж орж ирсэн.
Одоогоор цагдаагийн газраас мөрдөн байцаалтын ажиллагаа явагдаж байна.
