Монгол Улсын Их Хурлын дарга Г.Занданшатарын урилгаар албан ёсны айлчлал хийж буй Бүгд Найрамдах Энэтхэг Улсын Парламентын Лок Сабхагийн дарга эрхэмсэг ноён Ом Бирла Монголын Бурханы Шашинтны Төв-Гандантэгчэнлин хийдийн Тэргүүн их хамба лам Хамба номун хан, хичээнгүй зүтгэлт Д.Чойжамц гавжид Бурханы шашныг дэлгэрүүлэх, Энэтхэг-Монголын оюун санааны харилцааг хөгжүүлэхэд оруулсан идэвх зүтгэлийг өндрөөр үнэлж “Энэтхэгийн Соёлын Харилцааны Зөвлөлийн 2022 оны Бурханы Шашны Хүндэт Шагнал”-ыг гардуулав.
Хамба номын хан, хичээнгүй зүтгэлт Д.Чойжамц гавж 1992 оноос өнөөг хүртэл тэргүүн их хамба ламын албан үүргийг хашихын зэрэгцээ
• Нэгдсэн Үндэсний Байгууллагад бүртгэлтэй цорын ганц Бурханы шашинтнуудын энх тайвны хөдөлгөөн болох Азийн Буддистуудын энх тайвны бага хурлын Ерөнхийлөгч,
• БНЭУ-д төвтэй Олон улсын Бурханы шашинтнуудын холбооны Ивээгч,
• Япон Улсад төвтэй Дэлхийн Бурханы Шашинтнуудын Дээд Хэмжээний Чуулганы Ерөнхийлөгч
зэрэг олон улсын нэр хүндтэй байгууллагуудыг манлайлан удирдаж Монголын Бурханы шашин соёлыг дэлхий дахинд таниулж ирсэн зүтгэлтэн юм.
