Нийслэлийн онцгой комисс өнгөрсөн шөнө хуралдлаа. Хурлаар өглөөнөөс хойш хийсэн ажлын явц, тулгамдаж буй асуудлыг холбогдох албаныхан танилцуулсан.
Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа:
Өнөөдрийн хувьд ус соруулах, цэвэрлэгээ, ариутгалд төвлөрч ажиллалаа. Маргааш /өнөөдөр/ ариутгалын ажилд төвлөрнө. Ариутгалын бодис болон бусад шаардлагатай зүйлсийн нөөц хангалттай байгаа. Цахилгааныг яаралтай холбох шаардлагатай. Гэхдээ эрсдэлийг тооцоолж, аюулгүй байдлыг хангах ёстой. Мөн маш олон барилгад цууралт, ан цав үүсэж, суулт өгсөн байна. Тиймээс шаардлага хангаж байгаа эсэхэд үзлэг, хяналтын ажлыг яаралтай зохион байгуулах хэрэгтэй. Маргааш /өнөөдөр/ цэвэрлэгээ, ариутгалын ажлыг дуусгахаар төлөвлөсөн гэдгийг хэлж байлаа.
Д.Сумъяабазар: Ариутгал, халдваргүйжүүлэлтийг сайтар хийхэд анхаарах хэрэгтэй
Нийслэлийн Засаг дарга бөгөөд Улаанбаатар хотын Захирагч, Нийслэлийн онцгой комиссын дарга Д.Сумъяабазар зохион байгуулалтад орж ажиллаж, үерийн эрсдэлийг бууруулсан нийт бие бүрэлдэхүүнд талархал илэрхийлсэн юм. Мөн ариутгалыг маш сайн хийх үүрэг өглөө.
Тэрбээр “Хотод сүүлийн жилүүдэд ийм том хэмжээний үер болж байгаагүй. Хүн бүр хариуцсан ажилдаа эзэн болж, сэтгэл гарган ажиллаж, богино хугацаанд үр дүнд хүрэх ёстой. Ариутгал, халдваргүйжүүлэлтийг сайтар хийхэд анхаарах хэрэгтэй. Наадмаас өмнө хэвийн байдалд оруулахын төлөө ажиллана. Иргэд, аж ахуйн нэгжүүд бэлэн мөнгө, бараа, материалын тусламж, дэмжлэг өгч байгаа. Иймд үүрэг гүйцэтгэж буй алба хаагчид, нийслэлийн иргэдийн өмнөөс талархал илэрхийлье” хэмээв. Мөн хандив болон зарцуулалтыг ил тод, нээлттэй мэдээлэхийг үүрэг болгож, нөхцөл байдал тогтворжсон дүүргүүд бусад дүүрэгтээ туслах хэрэгтэйг онцоллоо.
