1992 оны АНУ-ын Олимпын эрэгтэй шигшээ багийг “Мөрөөдлийн баг” гэлцдэг. Нэг талбай дээр, нэг багийн өмсгөлтэй сагсанбөмбөг тоглосон дэлхийн хамгийн авъяаслаг тоглогчдын цуглуулга. Тус багийг Мэжик Жонсон, Ларри Берд, Майкл Жордан тэргүүтэй бүх цаг үеийн шилдэг тоглогчид толгойлж, Чарльз Баркли, Скотти Пиппен, Патрик Юинг, Карл Мэлоун, Дэвид Робинсон, Клайд Дрекслер, Жон Стоктон зэрэг алдрын танхимын гишүүд бүрэлдэхүүнд нь багтаж байв.
Парис 2024 зуны олимпын наадамд Америкийн шигшээ баг маш олон авъяаслаг тоглогчдыг бүрэлдэхүүн дээ багтаасан. Тэр дунд бүх цаг үеийн шилдэг тоглогч гэгддэг Леброн Жеймс, шилдэг шидэгч Стефен Көрри, шилдэг оноо авагч Кэвин Дурант тэргүүтэй тоглогчид бий. Мөрөөдлийн багаас илүү сайн байж чадах болов уу. Шалгуур нь олимпоор бусад өрсөлдөгчдөөсөө хэр илүү байж чадах вэ гэдгээс шалтгаална.
Спортын талаар дагнан бичдэг, нэрт подкастчин Дэнни Паркинс өнгөрсөн даваа гарагт Колин Каухердтэй хамт The Herd нэвтрүүлэгт оролцсон. Энэ үеэрээ тэрээр "2024 оны Америкийн эрэгтэй сагсанбөмбөгийн шигшээ баг бол бидний урьд өмнө харж байгаагүй хамгийн авьяаслаг баг. Мөрөөдлийн багаас ч илүү" гэж хэлжээ.
Парис-2024 наадмын АНУ-ын эрэгтэй сагсанбөмбөгийн шигшээ багийн бүрэлдэхүүнд NBA-гийн супер одууд болох Леброн Жэймс, Стефен Көрри, Кевин Дюрант, Жоэл Эмбийд, Бам Адебайо, Энтони Дэвис, Энтони Эдвардс, Девин Бүүкэр, Жрю Холидэй, Тайрез Халибуртон, Кавая Леонард, Жэйсон Тэйтум нар багтжээ.
Гуран жилийн өмнө цар тахлын улмаас хойшлогдсон Токио 2020 олимпын наадамд одоогийн Финикс Сансын Дюрант, Бүүкер болон Бостон Селтиксийн Татум, Холидэй, Лэйкерсын ЛеБрон Жэймс болон Энтони Дэвис оролцсон. Харин Голден Стэйт Уарриорс багийн тоглогч Көрри карьертаа анх удаагаа Олимпод АНУ-ын багийг төлөөлнө.
“Мөрөөдлийн баг 11 алдрын танхимын гишүүнтэй бол энэ жилийн баг ирээдүйн 12 алдрын танхимын гишүүнтэй” гэж АНУ-ын ахлах дасгалжуулагч Стив Керр онцолсон.
Дюкийн сагсан бөмбөгийн багийн тоглогч , ирэх жил NBA-гийн драфтын 1-р сонголтод нэрлэгдэж буй Купер Флагг “Энэ багт ямар нэг сул тал алга. Тэд тоглолтыг ямар ч хэлбэрээр давамгайлж чадна. Нэг ёсны цоорхойгүй баг. Энэ баг олимпод эзэрхийлэх болно" гэжээ.
АНУ-ын шигшээ багийн хамгийн том давуу тал төвийн байрлал гэж судлаачид үзэж буй. Хамгаалалт болон довтолгоонд эзэрхийлж тоглодог Энтони Дэвис, Жоел Эмбийд, Бам Адебайо нар будагтай талайд тоглоно. Франц, америкийн давхар иргэншилтэй Жоел Эмбийд NBA-гийн шилдэг шинэ тоглогч Виктор Вэмбаньяма, шилдэг хамгаалагч Руди Гоберт нартай хамтран АНУ-ын шигшээ багийн эсрэг өрсөлдөж болох байсан. Гэвч АНУ-ын төлөө тоглох шийдвэрийг гаргасан билээ. Францчууд 2020 оны Токиогийн Олимпод мөнгөн медаль хүртсэн. Энэ жил АНУ-ын шигшээ багтай хамгийн ширүүн өрсөлдөх нь Францын шигшээ байна.
Б.ТҮВШИН
