Зэвсэгт хүчний 336 дугаар анги Зэвсэгт хүчний 2024-2025 оны сургуулийн жил эхэлсэнтэй холбогдуулан байнгын бүрэлдэхүүнийхээ дунд “Эрч хүч, эв нэгдэл” уриан дор “Их говийн гарнизон-2024” хагас марафоныг зохион явууллаа.
Алба хаагчдын бие бялдрын бэлтгэлжилт, бэлэн байдал, хурд хүч, авхаалж самбааг сорьсон энэхүү тэмцээн хамт олны нөхөрсөг харилцааг улам бататгаснаараа онцлог болов.
Хагас марафонд 5 хүний бүрэлдэхүүнтэй 21 баг оролцсон ба эрэгтэйчүүд 23, эмэгтэйчүүд 10 км зайд уралдаж, “Ханбаянзүрх" хайрхнаас гараагаа эхлүүлсэн юм.
Ингээд тэмцээний дүнгээр хошууч В.Цогбадрах ахлагчтай “Хилэнц” баг тэргүүлж, хошууч К.Хайрат ахлагчтай “Бүргэд” баг дэд байрт, дэд хурандаа Н.Бат-Очир ахлагчтай “Шонхор” баг гутгаар байрт тус тус шалгарч, шагнагдав. Марафонд оролцсон бие бүрэлдэхүүнд ангийн захирагч хурандаа Н.Гүрбадам баяр хүргэж, хамт олны гар нийлэмжтэй ажиллагааг нэмэгдүүлэхэд чиглэсэн төлөвлөгөөт олон ажлын нэг нь марафон гүйлт байсныг тодотгосон юм.
Дэслэгч Э.ТОГОСМАА
