Зэвсэгт хүчний Хуурай замын цэргийнхэн 2024 оны ажил үйлсээ дүгнэж, тэргүүний алба хаагчдаа шалгарууллаа. Хуурай замын цэргийн командлал нь жил бүрийн төгсгөлд ажил үйлсээрээ манлайлсан удирдах албан тушаалтан, офицер, ахлагч, ажилтан албан хаагчдаас гадна Хуурай замын цэргийн нэгтгэл, ангиудаасаа шилдэг салааны захирагчийг шалгаруулдаг уламжлалтай.
Энэ нь залуу офицеруудад урам зориг өгч, ажил албаараа бахархах үзлээр цэнэглэж, хугацаатай цэргийн алба хаагчидтай тулж ажиллаж, цэргийн эрдмийг зааж буй хөдөлмөр зүтгэлийг нь үнэлэх зорилготой шалгаруулалт юм.
Энэ жилийн “Тэргүүний салааны захирагч”-ийн тэргүүн байрт Зэвсэгт хүчний 327 дугаар ангийн Мотобуудлагын батальоны мотобуудлагын нэгдүгээр ротын гуравдугаар салааны захирагч дэслэгч Эрдэнэтуяагийн Баянхүү, дэд байрт Зэвсэгт хүчний 326 дугаар ангийн Зенитийн артиллерийн дивизионы зенитийн артиллерийн нэгдүгээр батарейны нэгдүгээр салааны захирагч дэслэгч Цогтдэлгэрийн Цогтжаргал, гутгаар байрт Зэвсэгт хүчний 167 дугаар ангийн Мотобуудлагын батальоны хоёрдугаар ротын нэгдүгээр салааны захирагч, дэслэгч Сүрэнхорлоогийн Жавхлантөгс нар шалгарлаа. Шилдгүүдэд Хуурай замын цэргийн командлагчийн баярын өргөмжлөлийг анги бүрд нь хүргүүлж, тэргүүний салааны захирагчид өрсөлдсөн бусад нэгтгэл, ангийн залуу офицеруудад улам их амжилт ерөөж, талархал дэвшүүлэв.
Хуурай замын цэргийн командлалын “Тэргүүний удирдах албан тушаалтан”-аар Хуурай замын цэргийн ахлагч, тэргүүн ахлагч Далантайн Мөнхбаяр, “Тэргүүний офицер”-оор Сургалт бэлтгэлийн хэлтсийн ахлах офицер дэд хурандаа Бадамын Гансүх, “Тэргүүний ахлагч”-аар Захиргааны удирдлагын хэлтсийн нууцын хэрэг хөтлөгч, ахлах ахлагч Даваадоржийн Пүрэвтогтох, “Тэргүүний ажилтан албан хаагч”-аар Хангалт үйлчилгээний тасгийн нярав Балжиннямын Сувд-Эрдэнэ нар шалгарч, шагнагдлаа.
Мөн энэ удаа байгууллага хамт олондоо харилцаа хандлагаараа үлгэрлэж, байгууллагын соёлыг түгээгч алба хаагчийг командлалын хамт олны санал асуулгаар тодруулж, “Тэргүүний манлайлагч алба хаагч”-аар өргөмжилсөн ба үүний эзнээр Удирдлагын байрын буудагч, мэдээ боловсруулах оператор дэд ахлагч Балдоржийн Баттулга тодров.
Хуурай замын цэргийн командлалын оны тэргүүний алба хаагчдад шагнал гардуулах ёслолд ЗХЖШ-ын нэгдүгээр орлогч дарга, бригадын генерал Ж.Өсөхбаяр оролцож, баяр хүргэсэн юм.
