Италийн 80 мянган хүний суудалтай “Сан-Сиро” цэнгэлдэх хүрээлэнд өвлийн олимпын XXV наадмын галт бамбар бадамлан асахад ердөө таван цаг үлдлээ. Хүн төрөлхтний эв нэгдлийн бэлгэдэл болсон энэ удаагийн олимпод 93 орны 2871 тамирчин спортын 16 төрөлд 116 багц медалийн төлөө өрсөлдөнө.

Энэ олимпод АНУ 233 тамирчин оролцуулж байгаа нь хамгийн олон бол Монгол улсаас уулын цанын төрөлд А.Ариунбат, гүйлтийн цанын төрөлд Б.Ачбадрах, Э.Ариунтунгалаг нар оролцож буй нь 93 оролцогч орноос 58 дугаарт жагсах үзүүлэлт юм.

Олимпын наадмын нээлтийн ёслолд А.Ариунбат, Э.Ариунтунгалаг нар Монгол Улсын туг баригчаар жагсана.

А.Ариунбат нь уулын цанаар олимпод уралдах анхны Монгол тамирчин бол Э.Ариунтунгалагийн анхны олимп энэ.

Харин Б.Ачбадрах гурван олимп (2018, 2022, 2026) дараалан оролцох анхны монгол цаначин болно.

Өнгөрсөн оны арванхоёрдугаар сард Ромд ирсэн олимпын бамбар Италийн 20 бүсийн 110 муж нутгаар 12000 км аялан өнөөдөр Миланд ирсэн ба хөлбөмбөгийн ариун дагшин сүм гэгдэх “Сан-Сиро” цэнгэлдэхэд олимпын бамбар асахад тун хугацаа үлдсэн ба уг цэнгэлдэх хүрээлэнгийн 100 жилийн ой энэ онд тохиож байгаа аж.

Итали улс өвлийн олимпын наадмыг гурав дахь удаагаа (1956, 2006, 2026 онд) хүлээн авч байна.