Монголбанкны гаргасан хамгийн сүүлийн үеийн мэдээллээр 2026 оны наймдугаар сард улсын хэмжээнд жилийн инфляц 12.5 хувьд хүрч, өмнөх сараасаа 1.1 хувиар өслөө. Харин нийслэл хотын оршин суугчдын хувьд Улаанбаатар хотын инфляц 11.6 хувьтай гарч, өмнөх сараас 0.8 хувиар нэмэгдсэн үзүүлэлттэй байна.

Хэдийгээр инфляцын ерөнхий дүн өндөр байгаа ч улсын хэмжээнд үнийн өсөлтийн хурд өмнөх сараас ялимгүй саарахад хүнсний бүтээгдэхүүний үнэ буурсан нь гол тулгуур болжээ.

Юуны үнэ буурав? (Хүнсний бүлэг)

Намар цаг ирж, ургац хураалт эхэлсэнтэй холбоотойгоор хүнсний ногоо болон махны үнэ мэдэгдэхүйц хямдарч, иргэдийн нурууг бага боловч амраалаа.

• Хүнсний ногоо: Өмнөх сараас 18.5 хувиар огцом буурав.

• Мах, махан бүтээгдэхүүн: Өмнөх сараас 4.1 хувиар хямдарлаа.

• Импортын хүнс: Өмнөх сараас 0.2 хувиар үнэ нь ялимгүй буусан байна.

Юуны үнэ өсөв? (Инфляцыг хөөргөгч гол хүчин зүйлс)

Хүнсний үнэ буурсан ч шатахуун болон хичээлийн шинэ жил эхэлсэнтэй холбоотой боловсролын зардал инфляцыг голлон дээш нь чирлээ.

• Шатахуун (Хамгийн өндөр өсөлт): Зөвхөн ганц сарын дотор 7.3 хувиар, харин өмнөх оны мөн үеэс 28.2 хувиар огцом өсжээ. Энэхүү өсөлт нь нийт инфляцын хэмжээг хувийн жингээрээ 1.7 нэгж хувиар дангаараа дээшлүүлсэн байна.

• Боловсролын үйлчилгээ: Хичээлийн шинэ жилийн сургалтын төлбөр, зардал 17.4 хувиар нэмэгдэж, инфляцын дарамтыг 0.4 нэгж хувиар нэмэгдүүллээ.