Боловсролын яам, Японы олон улсын хамтын ажиллагааны байгууллага (ЖАЙКА), “Инженер, технологийн дээд боловсрол” (M-JEED) төслийн алба болон ШУТИС, МУИС, ХААИС хамтран 2026 оны 9 дүгээр сарын 17-ны өдөр “Монгол-Япон хамтарсан судалгаа-Бизнесийн түншлэл 2026” арга хэмжээг зохион байгууллаа.

Энэхүү өдөрлөг нь хоёр орны их сургууль, эрдэм шинжилгээний байгууллага болон бизнесийн хүрээнийхний хамтын ажиллагааг чангатгаж, хамтарсан судалгааны үр дүнг үйлдвэрлэл, технологи, инноваци болон бизнесийн практикт бодитоор нэвтрүүлэх боломжийг өргөжүүлэх зорилготой юм.

Арга хэмжээний нээлтэд Боловсролын яамны Төрийн нарийн бичгийн дарга Төмөр-Очирын Ням-Очир, Япон Улсаас Монгол Улсад суугаа Онц бөгөөд Бүрэн эрхт Элчин сайд Игавахара Масару нар үг хэлж, хоёр улсын хамтын ажиллагаа боловсрол, хүний нөөцийн хөгжлөөс хальж, судалгаа, технологи, инноваци, бизнесийн түншлэлийн чиглэлээр өргөжин хөгжиж байгааг онцоллоо.

"1,000 инженер" төслийн ололт амжилт ба ШУТИС-ийн шинэчлэл

Өдөрлөгийн үеэр олны дунд “1,000 инженер” хэмээн алдаршсан төслийн явц, ололт амжилтыг дүгнэж, судалгааны үр дүнг үйлдвэрлэлд нэвтрүүлэх арга замуудыг хэлэлцлээ. Төслийн зөвлөх Батмөнхийн Мөнхтулга хөтөлбөрийн хэрэгжилт болон цаашдын зорилтын талаар танилцуулсан бол ШУТИС-ийн Эрдэм шинжилгээ, инноваци эрхэлсэн проректор Данжхүүгийн Цолмонбаатар тус сургууль дээр гарсан ахиц дэвшлийг танилцуулав.

"1,000 инженер" төслийн хүрээнд ШУТИС нь инженерийн хөтөлбөрүүдээ олон улсын жишигт нийцүүлэн шинэчилж, багш, судлаачдын чадавхыг бэхжүүлэн, лабораториудаа орчин үеийн тоног төхөөрөмжөөр хангажээ.

• Технологийн шинэчлэл: Төслийн шугамаар ШУТИС-ийн 44 лабораторид 131 ангиллын 1,469 нэр төрлийн дэвшилтэт тоног төхөөрөмж, багаж хэрэгслийг нийлүүлсэн байна.

• Олон улсын сүлжээ: Түүнчлэн Япон улсын бизнесийн байгууллагууд болон тус улсын 10 консорциум их сургууль, судалгааны чиглэлээр 40 гаруй их сургууль, эрдэм шинжилгээний хүрээлэнтэй өргөн хүрээний түншлэл тогтоожээ.

Хамтарсан судалгааны 6 үндсэн чиглэл

Энэ жилийн арга хэмжээ нь судалгааны үр дүнг зөвхөн тайлагнаад зогсохгүй, тэдгээрийг практик технологи, бэлэн бүтээгдэхүүн болгон хувиргаж, бизнесийн боломж үүсгэхэд чиглэсэн бөгөөд судалгааны багуудын бүтээлээр постер танилцуулга, үзэсгэлэн зохион байгууллаа. Эрдэм шинжилгээний үндсэн хуралдаанууд дараах 6 чиглэлээр өрнөсөн байна:

1. Биотехнологи;

2. Шинэ ба дэвшилтэт материал;

3. Байгаль орчин;

4. Цэвэр болон сэргээгдэх эрчим хүч;

5. Дижитал технологи;

6. Хөдөө аж ахуй, хүнсний технологи.

ШУТИС-ийн судлаачид эдгээр салбарт Японы талтай хамтран гүйцэтгэсэн судалгааныхаа үр дүнг танилцуулж, цаашдын хамтын ажиллагаа, технологи дамжуулалт болон судалгааны үр дүнг үйлдвэрлэл, бизнесийн практикт нэвтрүүлэх боломжуудыг салбарынхантайгаа хэлэлцсэн байна.