БНСУ-ын нийслэл Сөүл хотын Итаевон дүүргийн клубүүдээр үйлчлүүлсэн, коронавирусний халдвар авсан өвчтөнтэй холбоотой халдварын 13 тохиолдол шинээр бүртгэгджээ.
Солонгосын Өвчинд хяналт тавих, урьдчилан сэргийлэх төвийн мэдээлснээр, өвчтөний ойрын хавьтал болох 14 хүнээс халдвар илэрсний гурав нь гадаадын иргэн, нэг нь армийн офицер ажээ.
БНСУ-д энэ долоо хоногийн эхнээс зайнаас харилцах арга хэмжээнүүдийг сулруулсан боловч дээрх үйл явдлын улмаас эрх баригчид, олон нийт дахин сонор сэрэмжтэй байх шаардлага үүссэн байна.
Олон нийтийн дунд байхдаа халдвар авсан хэмээн таамаглаж буй уг өвчтөн өнгөрсөн баасан гаргийн оройноос бямба гаргийн өглөө хүртэл Итаевон дүүргийн таван клуб, шөнийн цэнгээний газраар үйлчлүүлжээ.
“King”, “Trunk”, “Club Queen” зэрэг клубээр 1510 ба түүнээс дээш хүн үйлчлүүлсэн гэж Өвчинд хяналт тавих, урьдчилан сэргийлэх төвийн мэргэжилтнүүд тооцоолжээ. “Цаашид улам олон тохиолдол бүртгэгдэж болзошгүй байна” гэж Эрүүл мэндийн дэд сайд Ким Ган Лип мэдэгджээ.
Мөн Өвчинд хяналт тавих, урьдчилан сэргийлэх төв халдвар нэмж тархахаас урьдчилан сэргийлэх үүднээс дээр дурдсан клубүүдээр үйлчлүүлсэн хүмүүст өөрийгөө тусгаарлаж, “COVID-19”-ийн шинж тэмдэг илэрсэн тохиолдолд эмнэлэгт хандахыг уриалжээ.
Уг өвчтөн найзынхаа хамтаар /мөн халдвар илэрсэн/ баасан гаргийн 23 цагаас дараагийн өдрийн 03:50 минут хүртэл Итаевон дүүргийн таван клуб, шөнийн цэнгээний газраар оржээ. Түүний шинжилгээний хариу лхагва гаргийн өглөө гарч, Сувон хотын эмнэлэгт хүргэгдсэн байна.
Эх сурвалж: Yonhap
