Эрүүл мэндийн салбарт шинээр нэвтэрсэн эмчилгээ оношилгооны дэвшилтэт технологи, арга аргачлал, эм, эмнэлгийн хэрэгсэл, тоног төхөөрөмж, эрүүл мэндийн байгууллагын үйл ажиллагаа, бүтээгдэхүүнийг олон нийтэд сурталчлан таниулах зорилгын хүрээнд 2023 оны 9-р сарын 22-24 өдрүүдэд зохион байгуулагдсан “Эрүүл мэндийн технологи- Олон улсын Экспо -2023” үзэсгэлэнд Улсын гуравдугаар төв эмнэлэг 2023 онд өөрийн эмнэлгийн мэдрэлийн мэс засал, зүрх судасны мэс засал, зүрхний хэм судлал, тархины судсан дотуурх мэс заслын тусламж үйлчилгээний чиглэлд шинээр нэвтрүүлсэн нийт 6 технологийг танилцуулж амжилттай оролцлоо.
Тус эмнэлгийн хэм судлалын төвийн баг бүрэлдэхүүний БНХАУ-ын Шанхай хотын Рүйжин эмнэлэгтэй байгуулсан хамтын ажиллагааны хүрээнд Монгол улсад анхлан нэвтрүүлсэн “Тосгуурын жирвэгэнээ хэм алдагдлын үеийн хөлдөөх аблаци эмчилгээ”-ний технологи “Шилдэг технологи нэвтрүүлэгч байгууллага” номинацийн шагналыг гардан авлаа.
