2900 долларын үнэтэй DIOR цүнхийг ердөө 60 доллароор үйлдвэрлэдэг. Саяхан JTBC-ийн мэдээгээр Кристиан Диорын 3.8 сая вон (ойролцоогоор 2850 доллар) үнэтэй тансаг цүнхний үйлдвэрлэлийн өртөг нь ердөө 80,000 вон (ойролцоогоор 60 доллар) байгааг харуулжээ. Италийн шүүхийн шийдвэрээр эдгээр цүнхийг хямд үнээр үйлдвэрлэж, "Италид үйлдвэрлэв" гэсэн шошготой хятадын хууль бус цагаачид ашиглаж байсныг илрүүлжээ. Зургаадугаар сарын 10-нд Bloomberg болон бусад гадаадын хэвлэл мэдээллийн хэрэгслүүдийн мэдээлснээр, Италийн Миланы шүүх Dior Italia-ийн үйлдвэрлэлийн салбар болох Dior SRL-ийн эсрэг "Шүүхийн захиргааны урьдчилан сэргийлэх арга хэмжээ" авах шийдвэр гаргаж, тус компанид нэг жилийн хугацаанд хяналт тавих "Шүүхийн администратор"-ыг томилсон байна. Энэхүү үйлдэл нь тус компанийг Хятадын туслан гүйцэтгэгч компаниудад ажиллах хүч ашиглахыг зөвшөөрч, хөхүүлэн дэмжсэн гэх үндэслэлээр хийсэн үйлдэл юм.
34 хуудас бүхий шүүхийн шийдвэрт Dior цүнх үйлдвэрлэдэг туслан гүйцэтгэгч дөрвөн компанийн хөдөлмөрийн нөхцлийг нарийвчлан тодорхойлсон байна. Эдгээр үйлдвэрт голдуу Хятад, Филиппинээс ирсэн хууль бус цагаачдыг ажиллуулдаг байжээ. Үйлдвэрүүд амралтын өдөргүй 24 цагаар ажилладаг байсан тул ажилчид цехдээ унтахаас өөр аргагүй болжээ. Үйлдвэрлэлийг хурдасгахын тулд аюулгүйн төхөөрөмжийг машинуудаас салгасан байна. Үйлдвэрлэлийн зардлаа хэмнэсэн туслан гүйцэтгэгчид цүнх бүрийг 53 еврогоор (79,500 вон буюу 60 доллар) Dior-д заржээ. Дараа нь эдгээр цүнхийг Dior-ын дэлгүүрүүдэд 2600 еврогоор (ойролцоогоор 3.85 сая вон буюу 2850 ам. доллар) заржээ. Шүүхээс Dior-ын бизнесийн нэгжийг ханган нийлүүлэгчдийн ажлын бодит нөхцөл, техникийн чадавхыг шалгаагүй, тогтмол аудит хийгээгүйн төлөө хариуцлага хүлээлгэсэн байна.
Италийн мөрдөн байцаах албаныхан тансаг зэрэглэлийн бараа үйлдвэрлэгчдийн туслан гүйцэтгэгчдийн хөдөлмөрийн нөхцлийг хэдэн жилийн турш судалжээ. Энэ нь дэлхийн тансаг хэрэглээний 50 орчим хувийг үйлдвэрлэдэг Италийн уламжлалт арьс ширний үйлдвэрлэлийг Хятадад үйл ажиллагаа явуулдаг "хямд өртөгтэй компаниуд" сүйтгэж байна гэсэн болгоомжлолыг харуулсан юм.
Б.НАНДИН-ЭРДЭНЭ
