Монголын дугуйн холбоо шинэ жилийн цэнгүүн, амжилт, ажил үйлсээрээ бусдыгаа тэргүүлсэн шилдгүүдээ алдаршуулах ёслолын ажиллагааг 2024 оны XII сарын 30-ны өдөр “Хулан” ресторанд зохион байгууллаа.
Тамирчдыг Монголын дугуйн холбооны чансааг үндэслэн, Удирдах зөвлөлийн хурлаар хэлэлцүүлэн шилдгээр тодруулж, цом, өргөмжлөл олгон амжилт ялалтыг нь алдаршуулав.
Засмал замын дугуйн 23, уулын дугуйн 22 төрөлд шилдэг тамирчин тодруулсан бол “Парис 2024” зуны олимпын наадамд оролцож, цуваа гараатай уралдаанд 28, бөөн гараатай уралдаанд 57 дугаар байр эзлэн түүхэн амжилт гаргасан ОУХМ С.Жамбалжамц 2024 оны “Шилдгийн шилдэг” тамирчнаар тодорлоо. Тэрбээр сүүлийн дөрвөн жил дараалан, нийт тав дахь удаагаа “Оны шилдгийн шилдэг тамирчин” болов.
Мөн энэ өдөр Спортын төв сургуулийн багш, дасгалжуулагч, дугуйн спортын ОУХМ Б.Болдбаатар, ОУХМ Б.Хаянхярваа нар Хөдөлмөрийн гавьяаны улаан тугийн одон, ОУХМ Д.Энхтайван, улсын шүүгч Д.Адъяа, Х.Сүхбаатар нар Алтангадас одон, Удирдах зөвлөлийн гишүүн Т.Мөнхзол, улсын шүүгч А.Эрдэнэболд нар Хөдөлмөрийн хүндэт медаль, ОУХМ Д.Зинадугар МҮОХ-ны "Алтан очир" одонгоор шагнуулж, хөдөлмөр бүтээлээ үнэлүүлсэн юм.
Цэнгүүнд Монголын дугуйн холбооны ерөнхийлөгч Б.Гүрсоронзон, ЕНБД Т.Төгөлдөр, Удирдах зөвлөлийн гишүүд, орон нутгийн салбар холбоод, клубийн удирдлага, үе, үеийн тамирчид, дасгалжуулагчид оролцож, 2024 оны ажил үйлс, амжилтаа дүгнэж, 2025 оны зорилтоо дэвшүүлэн, шинэ жилийн баяраа хамтдаа тэмдэглэж өнгөрүүллээ.
