Шинэ олимпын наадмын цикл эхэлсэн 2025 онд Монголын 15 спортын холбоод улсын аварга шалгаруулах тэмцээний зохион байгуулалтыг Монголын спортын корпорацад “даатгалаа”. Энэ сарын 10-нд албан ёсоор хөшгөө нээсэн нэгдсэн холбоодын улсын аварга шалгаруулах тэмцээн зургаан өдрийн дараах байдлаар жүдо бөх, жюү жицү, байт харваа,виртуал дугуй, спорт бүжиг, хүндийн өргөлт, бадминтоны аваргууд тодроод байгаа бол үлдсэн өдөр бид орчин үеийн спортын 5 төрөлт, хананд авиралт, мөсөнд авиралт, буудлага, кэндо, тэргэнцэртэй сэлмэний шинэ оны улсын аваргуудыг тодруулна.
Монголын спортын корпорац 4 дэх жилдээ ийнхүү спорт холбоодын нэгдсэн улсын аварга шалгаруулах тэмцээнийг зохион байгуулж буй нь энэ. Энэ жилийн тэмцээнийг Монголын спортын хөгжлийн төлөө, спорт холбоодыг дэмжих хөтөлбөрийн хүрээнд 1XBet Charity fund ивээн тэтгэн хамтран оролцож байна.
