ТАТАР МАЙДАР
Монгол Улс Киргиз Улстай хийх гадаад худалдааны эргэлтийг одоогийн түвшнээс 5.3 дахин өсгөж, 100 сая ам.долларт хүргэх зорилт тавиад байгааг Ерөнхийлөгчийн Тамгын газраас мэдээллээ.
Бишкек хотноо зохион байгуулагдаж буй Шанхайн хамтын ажиллагааны байгууллага (ШХАБ)-ын Төрийн тэргүүнүүдийн зөвлөлийн өргөтгөсөн хуралдааны өмнө Монгол Улсын Ерөнхийлөгч Ухнаагийн Хүрэлсүх, Киргиз Улсын Ерөнхийлөгч Садыр Жапаров нар хоёр талт уулзалт хийсэн байна. Уулзалтаар талууд улс төр, эдийн засаг болон худалдааны түншлэлийг идэвхжүүлэх өргөн хүрээний асуудлыг хэлэлцжээ.
Ерөнхийлөгчийн Тамгын газрын мэдээлэлд дурдсанаар, төрийн тэргүүнүүд худалдааны балансыг дэмжих замаар нийт эргэлтийг 100 сая ам.долларт хүргэх, мөн аж үйлдвэр, тээвэр, логистикийн сүлжээг өргөтгөх, хоёр улсын хооронд шууд нислэг үйлдэх, соёл, хүмүүнлэгийн салбарын харилцааг шинэ шатанд гаргахаар тохиролцсон байна.
Өнөөгийн эдийн засгийн үзүүлэлт:
Монгол Улсын Гаалийн ерөнхий газрын албан ёсны тайлангаар 2025 оны эцэст хоёр улсын хоорондын худалдааны эргэлт 19 сая ам.доллартай тэнцэж байжээ. Хоёр орны экспортын бүтцийн дийлэнх хувийг мал аж ахуйн гаралтай түүхий эд болон хүнсний бүтээгдэхүүн бүрдүүлж байгаа бөгөөд цаашид аж үйлдвэр, тээврийн салбарыг либерализаци хийснээр худалдааны хэмжээг богино хугацаанд огцом өсгөх боломжтой гэж шинжээчид үзэж байна.
|
Эдийн засаг
