ТАТАР МАЙДАР
Өнөөгийн хөдөлмөрийн зах зээлд шинээр хөл тавьж буй залуу ажилчид эрх зүйн мэдлэг дутмаг байдлаас шалтгаалан ажлын байрны таагүй нөхцөлд өртөх эрсдэл өндөр байдаг. Үүнээс урьдчилан сэргийлэх, залуусыг ажлын байрандаа өөртөө итгэлтэй, дарамт шахалтгүй ажиллах нөхцөлийг бүрдүүлэх зорилготой сургалтыг Олон Улсын Хөдөлмөрийн Байгууллага (ОУХБ) Улаанбаатар хотноо зохион байгууллаа.
"Зохистой хөдөлмөр ба ажлын байр дахь залуучуудын эрх" сэдэвт энэхүү сургалтад ноолуур, зочлох үйлчилгээний салбарын залуу ажилчид болон үйлдвэрлэлийн дадлага хийж буй оюутнууд хамрагдсан байна.
Залуус уг сургалтаар дараах зүйлсийг мэдэж авчээ:
- Эрхээ хамгаалах, ажлын байрны дарамтаас сэргийлэх нь: Залуу ажилчид хөдөлмөрлөх эрх, ажлын байрны эрүүл, аюулгүй нөхцөл, тэгш байдал болон хариуцлагатай бизнесийн практикийн талаар бодит мэдлэгтэй боллоо. Энэ нь тэдэнд ажлын байрны ялгаварлан гадуурхалт, дарамт шахалтаас өөрийгөө болон хамт олноо хамгаалах практик хэрэгсэл болж байна.
- Хуулиа өдөр тутмын амьдралдаа хэрэглэх нь: Сургалтад ОУХБ-ын дэлхий нийтэд ашигладаг "Work Wise Youth" гарын авлагыг ашигласан бөгөөд уг материалыг Монгол Улсын Хөдөлмөрийн тухай хуулийн шинэчилсэн найруулгад нийцүүлэн нутагшуулсан байна. Энэ нь өдөр тутамд тулгардаг асуудлуудаа хуулийн дагуу зөв шийдвэрлэхэд тусална.
- Инновацаар ажлын байраа өөрчлөх нь: Сургалтын үеэр "SCORE Youth Innovation Challenge 2026" уралдааныг зарласан байна. Үүгээр залуус зөвхөн эрхээ хамгаалаад зогсохгүй, өөрсдийн ажиллаж буй компанидаа залууст ээлтэй, бүтээмжтэй соёл, шинэ санааг нэвтрүүлж, бодит өөрчлөлт хийх боломжийг суралцжээ.
Төслийн дэмжлэг:
Энэхүү хөтөлбөрийг Бүгд Найрамдах Солонгос Улсын Засгийн газрын санхүүжилттэй "Залуучуудын хөдөлмөр эрхлэлтийг дэмжих төсөл" (YEPP) болон Европын Холбооны санхүүжилттэй "Зохистой хөдөлмөрийн төлөөх худалдаа" төслийн хүрээнд хамтран хэрэгжүүлж байна.
|
Эдийн засаг
