Түүнчлэн Кыргызстаны бэлэн хувцас үйлдвэрлэгчид монголын  түүхий эд бэлтгэгчдтэй хамтран ажиллана гэлээ.

Монгол, Кыргызстан улсууд ЕАЭБ-ын хэлэлцээрийн хүрээнд худалдаагаа өргөжүүлэх боломжуудыг хэлэлцсэн байна.

Монгол Улс болон Кыргызстан улсууд хоёр талын худалдааг өргөжүүлэх, аж үйлдвэрийн салбарын хамтын ажиллагааг бэхжүүлэх, мөн жижиг, дунд үйлдвэрлэлийг хөгжүүлэх боломжуудын талаар санал солилцлоо. Энэхүү уулзалт нь Монгол Улс болон Евразийн эдийн засгийн холбоо (ЕАЭБ) хоорондын Худалдааны түр хэлэлцээр хүчин төгөлдөр болсонтой холбоотойгоор өрнөж байгаагаараа онцлог юм. 

Кыргызстан улсын Гадаад хэргийн яамнаас мэдээлснээр, Кыргызстан улсаас Монгол Улсад суугаа Онц бөгөөд Бүрэн эрхт Элчин сайд Айбек Молдогазиев болон Монгол Улсын Жижиг, дунд үйлдвэрийн газрын дарга Ядамсүрэнгийн Эрдэнэсайхан нар уулзаж, дээрх асуудлуудыг хэлэлцсэн байна. Уулзалтаар хоёр орны бизнес эрхлэгчдийн хооронд шууд харилцаа тогтоох, аж үйлдвэрийн хамтарсан төслүүдийг хэрэгжүүлэх хэтийн төлөвийг ярилцжээ.

Талууд өнгөрсөн 2026 оны 7 дугаар сарын 22-ны өдрөөс хэрэгжиж эхэлсэн Монгол Улс болон ЕАЭБ хоорондын Худалдааны түр хэлэлцээрээс үүдэлтэй шинэ боломжуудад онцгой анхаарал хандуулсан байна. Энэ хүрээнд тарифийн хөнгөлөлт, бүтээгдэхүүний баталгаажуулалтад тавигдах шаардлага, гарал үүслийн дүрэм болон гаалийн журмын талаар бизнес эрхлэгчдэд мэдээлэл хүргэх нь чухал байгааг тэмдэглэв. 

Мөн хөнгөн болон хүнсний үйлдвэрлэл, хөдөө аж ахуйн бүтээгдэхүүн боловсруулах салбар дахь хамтын ажиллагааны асуудлыг хөндлөө. Тодруулбал, Кыргызстаны бэлэн хувцас үйлдвэрлэгчид болон Монголын ноос, ноолуур, нэхмэлийн түүхий эд бэлтгэгчдийн хооронд хамтран ажиллах боломжуудыг судалсан байна. 

Үүнээс гадна ирэх 11 дүгээр сарын 20-ноос 25-ны өдрүүдэд Бишкек хотноо зохион байгуулагдахаар төлөвлөгдөж буй «Монголын өдрүүд – Бишкек 2026» (Монголия күндөрү – Бишкек 2026) арга хэмжээний бэлтгэл ажлын талаар ярилцжээ. Уг арга хэмжээний хөтөлбөрт бизнес форум, монгол бүтээгдэхүүний үзэсгэлэн болон хоёр талын бизнес уулзалтууд багтаж байгаа юм байна. 

Уулзалтын төгсгөлд талууд Монгол, Кыргызстаны бизнес эрхлэгчид болон холбогдох байгууллагуудын түншлэлийг улам бүр гүнзгийрүүлж, хамтарсан санаачилгуудыг идэвхтэй хэрэгжүүлэх сонирхолтой байгаагаа илэрхийллээ.