2023 оны 07 дугаар сарын 24-ний өдрийн 13 цагийн байдлаар Налайх дүүргийн 1 дүгээр хороо, Горхи тэрэлж амралтын газрын урд гарам, Байтаг богд амралтын газрын орчим, Мойлтын тохой орчим үерийн нөхцөл байдал үүссэн бөгөөд тус хэлтсийн Эрэн хайх, аврах бүлгийн алба хаагчид эдгээр 3 байршилд усанд боогдсон иргэдийг аюулгүй газарт хүргэн, авран хамгаалахаар ажиллаж байна.
Одоогийн байдлаар 98 иргэнийг аюулгүй газарт хүргэсэн байна.
Ойрын өдрүүдэд үргэлжилсэн борооны улмаас Туул, Тэрэлж голын усны түвшин үерийн аюулын түвшнээс давж үерлэсэн байгаа тул, иргэд та бүхэн энэ чиглэлд зорчихгүй байхыг анхааруулж байна.
Үерийн нөхцөл байдалтай холбогдуулан урьдчилан сэргийлэх дараах зөвлөмжийг хүргэж байна.
- Гуу жалгын ойролцоо, гэр, хашаа, саравч, орон байраа барьсан, суурьшсан айл өрх үерийн ус зайлуулах суваг шуудуу татах, далан хашлага барих зэргээр өөрийн болон бусдын амь нас, эрүүл мэнд, эд хөрөнгийг болзошгүй гамшиг ослоос урьдчилан сэргийлэх.
- Бага насны хүүхдийг гол ус, гуу жалганы ойролцоо тоглуулахгүй байх, хүүхдэд тавих хараа, хяналтаа сайжруулах.
- Голын усны түвшин нэмэгдэж, үерийн байдалд шилжсэн үед гармаар зорчихгүй, зориулалтын гарцтай газраар зорчих.
- Хол замд тээвэр хийж яваа жолооч нар баталгаат гүүр гармаар гарах
- Тулгуур хазайсан, унасан, унжсан утсанд шүргэж амь нас, эрүүл мэндээрээ хохирч болзошгүй тул сонор сэрэмжтэй байхыг анхааруулж байна.
