Монгол Улс олимп, паралимпын 4 аваргатай боллоо. "Бээжин 2008" Паралимпын наадмаас байт харвааны төрлөөс Хөдөлмөрийн баатар, Гавьяат тамирчин Д.Баатаржав анхны алтан мeдалийг эх орондоо авчирч байсан бол өчигдөр Токиогийн наадмаас пауэрлифтингийн төрөлд "Рио 2016" Паралимпын хүрэл мeдальт, Гавьяат тамирчин Э.Содномпэлжээ хоёр дахь алтыг авлаа. Монголын баг нэг алт, шагналт гурван байртай 45-р байрт жагсаж эхэллээ. Токиогийн наадмаас 68 орон мeдаль хүртээд байна. Өнөөдөр буудлагын тамирчин З.Ганбаатарын тэмцээн эхэлнэ.
