Бид ор дэрний цагаан хэрэглэлээ угаахдаа зөөлрүүлэгч байнга хэрэглэдэг. Зөөлрүүлэгч хэрэглэхгүй л бол цагаан хэрэглэл хатуу даргар байгаа мэт санагддаг. Гэтэл бидний байнгын туслагч болсон зөөлрүүлэгч эрүүл мэндэд хэрхэн сөргөөр нөлөөлдгийг доорхи мэдээллээс уншаарай.
Бидний олонхи сурталчилгааны нөлөөнд автаж дотуур хувцас, ор дэрний даавуу маань угаасны дараа шинэ мэт болж, сайхан үнэртэй, ер бусын зөөлхөн болдог гэдэгт итгэдэг. Хэрвээ та ангижруулагчийн хайрцаг дээр бичсэн бүтцийнх нь тухай анхааралтай харвал тэнд шинэ сайхан гэхэд хэцүү гэмээр олон зүйл байгааг харах билээ. Ер нь бол хүний дотуур хувцас, ор дэрний даавууг ийм химийн бодисоор угаах шалтгаан бараг үгүй гэж хэлж болно.
Зөөлрүүлэгчийн бүтцэд Альфа-терпинол хэмээх бодис ордог. Энэхүү цэцгийн үнэртэй, хүчтэй, аюултай химийн бодис нь хүнийг толгой эргэх, толгой өвдөх, ой ухаан муудах, бүр нүүр хавдах, хүзүү нуруу өвдөх зэрэг ноцтой байдлаар эрүүл мэндэд муу нөлөө үзүүлдэг байна. Мөн бензилацетат хэмээх нарийн төвөгтэй бүтэцтэй эфир нь маш их хортой эд аж. Энэ нь янз бүрийн хорт хавдрын эх үүсвэр болдог бөгөөд энэхүү бодисын уур нь амьсгалын зам, нүдийг хямруулж, зүрх судасны үйл ажиллагаанд муугаар нөлөөлөхөөс гадна мэдрэлийн үйл ажиллагаанд ч бас хортой гэнэ. Зөөлрүүлэгчийн найрлагад бензилийн спирт мөн орно. Энэ өнгөгүй тунгалаг шингэн нь хөнгөн зөөлөн үнэртэй боловч хүний эрүүл мэндэд олон хортой нөлөө үзүүлэх ба эдгээр нь төв мэдрэлийн системийг хямраах, толгойн өвчин, дотор муухайрах, бөөлжих, толгой эргэх, цусны даралт огцом буух зэрэг нөлөөг үзүүлдэг байна. Өөр нэг найрлага болох хлороформ нь маш хүчтэй химийн бодис бөгөөд хүний эрүүл мэндэд олон төрлийн хортой үйлчлэл үзүүлдэг байна. Жишээ нь ухаан алдах, дотор муухайрах, толгой өвдөх, бөөлжих, толгой эргэх, унтаа байдалд орох гэх мэт. Энэ бодис амьсгалах үед болон арьсанд шингэх байдлаар хүнийг аажмаар хордуулна. За сүүлчийн орц болох линалоол. Өнгө үнэргүй энэ шингэнийг бараг л наркотик гэж хэлж болох ба амьсгал болон булчингийн үйл ажиллагаанд ихээхэн муу нөлөө үзүүлнэ.
Ийнхүү бидний хамгийн нандин дотуур хувцас, цагаан хэрэглэлд зориулсан ангижруулагч нь ийм аюултай хортой бодис агуулдаг байх нь байна. Эзэгтэй та зөөлрүүлэгч худалдан авснаар зөвхөн мөнгө үрээд зогсохгүй бүр өөртөө болон гэр бүлийнхээ хүмүүсийн эрүүл мэндэд хор учруулж байгаа явдал юм.
